«Գաթային Գաղտնիքը» Մանկական Գունազարդ Հրատարակութիւն։ Հայ մանուկի
տարին հարստացաւ բազմատեսակ հրատարակութիւններով: Արամ Ա. վեհափառին հռչակած Հայ մանուկի
տարին ունեցաւ զանազան անդրադարձներ, որքան հրատարակչական, նոյնքան` դասախօսական կամ
այլ կարգի ձեռնարկներով: Համազգայինի Լիբանանի «Վահէ Սէթեան» հրատարակչատունը կազմակերպեց
մանկապատանեկան գիրքերու ցուցահանդէս: Այս առիթով կազմակերպուեցան նաեւ միջդպրոցական
ընթերցանութեան մրցում` չորս լեզուներով, հայերէն, արաբերէն, ֆրանսերէն, անգլերէն: Կատարուեցան
նաեւ միջդպրոցական գծագրութեան մրցումներ, նոյնպէս` գիրքերուն հետ մտերմանալու տարբեր
աշխատանքներով մրցումներ: Այս մարզը եղաւ տարաբնոյթ եւ հետաքրքրական` իր տեսակին մէջ:
Հայ գիրքերու նկարազարդ հրատարակութիւնները ուրախութիւն ներշնչեցին մանուկներուն եւ անոնց
ծնողներուն, նաեւ` մանկավարժ ուսուցչուհիներուն: 2011-ին լոյս տեսաւ նկարազարդ ալպոմ
մը` «Գաթային գաղտնիքը» անունով: Հեղինակն է Սօսէ Խտըշեան-Պէրպէրեան, որ գրած է թեման
եւ նոյն ատեն նկարազարդած է գունագեղ ներկայացումով: 32 էջերու վրայ արձանագրուած
պատմութիւն մըն է, որ կը կատարուի մեծ մամային եւ իր թոռան` Արենիին միջեւ: Թէ ինչպէ՛ս
կը պատրաստուի Զատկուան գաթան եւ ի՞նչ է անոր փոխանցած գաղտնիքը: Մարիամ մեծ մաման
համբերատար է ու մանրամասնութեամբ ցոյց կու տայ յստակ բացատրութիւններով, թէ ինչպէ՛ս
կը դիմաւորուի Ս. Զատիկը հայ տուներէն ներս: Հոս հարցը կը կեդրոնանայ հայկական աւանդութիւններուն,
մեր արմատներուն հետ կապուած մնալու հիմնական հարցերուն վրայ, որոնցմով կը պահպանուի
հայ ընտանիքը սերունդէ սերունդ: Նոր օրերուն մեր բարքերը խախտումներ արձանագրած են,
որովհետեւ կարգ մը հայ ընտանիքներու մէջ անտեսուած է աւանդութեան հետ մտերմանալը, թոռնիկ
եւ մեծ մայրիկ կամ մեծ հայրիկ յարաբերութիւններն ալ նուազագոյն աստիճանի հասած են: Հետեւաբար
ուրախութիւնը կ՛ունենանք, երբ նոր սերունդի մեր երիտասարդ մայրերուն մէջ տեսնենք աւանդութիւնները
արժեւորողներ, որոնք իրենց թարմատի զաւակներուն կը փոխանցեն իրենց մանկութեան տարիներուն
ընտանեկան եւ մեծ մամային հետ ունեցած փորձառութիւնը` զայն արտայայտելով մանկական գրականութեամբ: Այս
հրատարակութիւններէն է նոր լոյս տեսած, Համազգայինի «Վահէ Սէթեան» հրատարակչատան մէջ
տպուած` «Գաթային գաղտնիքը» նկարազարդ ալպոմը, ուր էջ առ էջ նկարներով եւ հակիրճ բացատրութիւններով
կը ներկայանայ գաթան պատրաստելու արարողութիւնը: Թոռնուհի Արենին լրջութեամբ կը հետեւի
գաթան շաղելու եւ պատրաստելու գործընթացին: Ի վերջոյ գաթան պատրաստուած է եւ անուշ կը
բուրէ: Մեծ մաման կը թելադրէ Արենիին` երկու գաթայ տանիլ վարի դրացիին, երկու գաթայ`
Նիկոլին, վերադարձին` երկու գաթայ ալ Շաղիկին: Արենին կը զարմանայ ու կ՛ըսէ մեծ մամային. -
Բայց, մեծ մամա, մեզի բան չմնաց: - Մնացածը մեզի կը բաւէ, Արենի՛: - Մեծ մամա՞,
դեռ չըսիր գաթային գաղտնիքը: - Ձա՛գս, գաթային գաղտնիքը զայն բաժնելուն մէջն է, այս
սովորութիւնը միշտ պահէ,- կը յորդորէ մեծ մաման…: Զառակս ի՞նչ ցուցանէ, թէ մեր գոյութեան
պահպանումը, մեր ազգային ու ցեղային ինքնութեան անվթար պահպանումը մեր աւանդութիւններուն
հանդէպ մեր յարգանք ունենալն է, որ մեզ պիտի հեռացնէ օտարամոլութենէ` մեզ ամուր կապելով
մեր արմատներուն: Աւանդապահութիւնը կը գոյատեւէ ազգին իրաւ դիմագիծը: